مسألة

يلّي جمالك مسألة..
ممكن سؤال لو تسمحي؟..
هو انتى من ضمن البشر؟!
يعني.. جمالك ده بجد؟!! 
طيب ...عنيكي دول كده؟!!
ولا النجوم سابت السما وسكنت عنيكي بالرضا؟
معذور أنا في الأسئلة
ما انتى جمالك مشكلة
بين البنات ولا ليكي زي
حبة عنب ..فرت من العنقود من كتر الحلا 
صوتك دفا
قلبك براح 
حبك قدر
وأنا قلبي عود عطشان ومشتاق للمطر
لحظة يا بنت النهار
تسمعيني واسمعك
ما تقربي يا ست القمر
هو الكمان يقدر يعيش من غير وتر
ولا الطيور ممكن تخاصم الشجر
حبك ونس والليل طويل
والكلمة ضى وسلسبيل
عابر سبيل
عاشق أنا يا محسنين
محتار أنا 
وعنيكي ضي 
سامعاني يا بنت النهار