....ألبوم صور

.
جوه ألبوم الصور 
ساكنة صندرة الوجع
صورة ليا ويا فهمي
ويا رشدي
ويا عالية وسامى عزت
مجدى رأفت وابتسام
كل ديا ذكريات كات جميلة
الزمن خلاها مخزن للألام
صورة لينا فى القناطر
صورة من حفلة تخرج
صورة تانية وشعري فيها كان كابوريا
صورة فيها الضحكة بتهز الشجر
صورة فيها الشعر هايش
صورة لما كنت عايش
صورة لما كنت فاكر إنى هألمس القمر
صورة ويا صاحبي عادل
قبل ما يودعنا فجأة
أصل كان من يومه نسمة
كل صوره ضحكو مرسوم ع الشفايف
صورة فيها دراعه مفرود زي طير
برضو فيها كان بيضحك..تقولش عارف!!
انه راح يفارقنا بدري ..حُسن سير
عيني لمحت نص صورة
كنت فيها وحد تانى كان هاممني
لما غَدرتْ ..المقص كان بيقطع حته مني
فجأة وأنا سرحان فى البوم ذكرياتي
بنتي جات تاخد معايا صورة سيلفي
ابتسمت معاها ونسيت اللى راح
مهما كان الماضى يوجع
ضحكة واحدة من عينيها قادرة تقفل كل أبواب الجراح