أنا إخوان وكل المسلمين إخوان..كلام معقول
لكن مين خان ومين خوان ومين ع الهم ده مسئول
ومين ساب الميدان موهوم بنشوة فوز وسكرة نصر خداعة كما المسطول
وراح بيلم في غنايم وساب إخوانه كغنايم ووقت الجد عمل نايم وقال مشغول
ومين أمرك تشوهني عشان ضدك ؟
وتلعني في صلواتك وشتمي جزء من وِردك
أنا ياما ايديا وضهرى كانو درعك في وش الغول
يا إخواني..نسيت على طول
لكن اعرفني أنا كويس لا عمري في يوم هخاف منك
ولا اقبل يوم أعيش كمشان كفار مبلول
تقولو عليا علماني تقولو عليا ليبرالي تقول كافر تقول ملحد وتنعتني بإنى فلول
لكن عمري ما ها أرضى أشوف الظلم بعنيا وأقف مشلول
أنا ممكن أموت وأحيا متين مرة لكن عمري ما أقبل يوم أعيش دلدول
وبوس الإيد مبعرفهوش لأني حر
وصوتي من غيطان راسي لأني حر
لا زنزانتك هتحبسنى لأني حر
أنا صابر كما أيوب صبر ع المر
وناعسة راح تعود تانى كما كانت ما أنا حبيبها
وتمسح كل أحزانى بلمسة واحدة من ايدها
أنا فداكي يا ست الكل يا عفية
ولو دمى هينزل نقطة ورا نقطة هيرسم بنت مصرية
ريحتها المسك والعنبر وقلبها لسه عود أخضر
تاخدنى في حضنها الدافى واسمع قلبها الصافي
الاقى قلب دقاته آذان العصر
وبين الدقة والدقة خريطة مصر
* * *
يا إخوانى
تعالى نبنى في بلدنا كمصريين
لا إخواني ولا سلفي ولا مسيحي لكن إنسان ليوم الدين
ولو فرقت يوم بينا بايه هيفيدك التمكين ؟
نرجع كل أمجادنا ونبقى صحبة أيد واحدة كيوم حطين
لكن تهتف على الأقصى تقول رايحين
قوم ابني بلدك الأول وبعديها على القدس نروح ملايين
لكن تغتر بالسلطة وتقصينا ده يرضى مين
ده ربنا قال "أعدوا"
لكن انت بدال ما تعد لعدوك عاملي كمين
قوم ادعى ربنا يغفر ويرحمنا يوحدنا وقولو آمين
ليست هناك تعليقات:
إرسال تعليق